Nithiin, Keerthy Suresh Emito Idhi Lyrical From Rang De Movie

Nithiin, Keerthy Suresh Emito Idhi Song: యూత్ స్టార్ నితిన్, ‘మహానటి’ కీర్తి సురేష్ జంటగా నటిస్తోన్న రొమాంటిక్ ఫ్యామిలీ డ్రామా ‘రంగ్ దే’. వెంకీ అట్లూరి దర్శకత్వం వహిస్తున్నారు. నితిన్ వివాహ మహోత్సవం సందర్భంగా ఆయనకు శుభాకాంక్షలు చెబుతూ ‘రంగ్ దే’ చిత్రం నుంచి విడుదల అయిన చిన్న వీడియో దాదాపు 14 మిలియన్స్‌కు పైగా వ్యూస్ సాధించింది. అయితే, ఇప్పుడు ఈ చిత్రం నుంచి తొలి గీతాన్ని వీడియో రూపంలో ఈరోజు విడుదల చేసింది చిత్రం యూనిట్.

ఈ పాటకు శ్రీమణి సాహిత్యం సమకూర్చారు. హరిప్రియ, కపిల్ కపిలన్ ఆలపించారు. చాలా నెమ్మదిగా సాగే ఈ రొమాంటిక్ మెలోడీని రాక్‌స్టార్ దేవిశ్రీ ప్రసాద్ చాలా అందంగా కంపోజ్ చేశారు. ఈ మధ్య కాలంలో దేవి నుంచి ఇలాంటి పాట రాలేదంటే అతిశయోక్తి కాదు. అంత బాగుంది. పాట చిత్రీకరణ కూడా అంతే అందంగా ఉంటుందని చెబుతోంది చిత్ర యూనిట్.

ఈనెల చివరి వారం నుంచి చిత్రానికి సంబంధించిన కొన్ని కీలక సన్నివేశాలు, దుబాయ్‌లో పాటలచిత్రీకరణ ఉంటుంది. కొద్ది రోజుల్లో షూటింగ్ మొత్తం పూర్తిచేయనున్నారు. 2021 సంక్రాంతి కానుకగా చిత్రం విడుదల అవుతుంది. పి.డి.వి. ప్రసాద్ సమర్పణలో సితార ఎంటర్‌టైన్మెంట్స్ బ్యానర్‌పై సూర్యదేవర నాగవంశీ ఈ సినిమాను నిర్మిస్తున్నారు. సుప్రసిద్ధ ఛాయాగ్రాహకుడు పి.సి.శ్రీరామ్ ఈ చిత్రానికి ఛాయాగ్రహణం వహిస్తున్నారు. సీనియర్ నటుడు నరేష్, వినీత్, రోహిణి, కౌసల్య, బ్రహ్మాజీ, వెన్నెల కిషోర్, సత్యం రాజేష్, అభినవ్ గోమటం, సుహాస్, గాయత్రి రఘురామ్ తదితరులు నటిస్తున్నారు.