Satyadev Kancharana, Tamannaah Starrer Gurthunda Seethakalam Movie Launched

యంగ్ హీరో స‌త్యదేవ్, మిల్కీబ్యూటీ త‌మన్నా జంటగా న‌టిస్తున్న చిత్రం ‘గుర్తుందా శీతాకాలం’. నాగ‌శేఖ‌ర్ ద‌ర్శక‌త్వం వహిస్తున్నారు. నాగ‌శేఖ‌ర్ మూవీస్ బ్యాన‌ర్‌పై నాగ‌శేఖ‌ర్‌, భావ‌న ర‌వి సంయుక్తంగా నిర్మిస్తున్నారు. ఈ చిత్ర షూటింగ్ శుక్రవారం పూజా కార్యక్రమాల‌తో ప్రారంభ‌మైంది. ఈ కార్యక్రమంలో చిత్ర హీరో స‌త్యదేవ్, ద‌ర్శకనిర్మాత నాగ‌శేఖ‌ర్, సంగీత ద‌ర్శకుడు కాల‌భైర‌వ‌, సినిమాటోగ్రాఫ‌ర్ స‌త్య హెగ్డే, చిత్ర యూనిట్ స‌భ్యులు పాల్గొన్నారు.

ఈ సంద‌ర్భంగా స‌త్యదేవ్ మాట్లాడుతూ.. ‘‘గుర్తందా శీతాక‌లం చిత్రంలో న‌టించేందుకు నాకు అవ‌కాశం ఇచ్చిన ద‌ర్శక‌నిర్మాత నాగ‌శేఖ‌ర్ గారికి ప్రత్యేక కృత‌జ్ఞత‌లు. ఈ సినిమాలో నా పాత్ర చాలా ఎమోష‌న‌ల్‌గా ఉంటుంది. ఈ సినిమాలో త‌మ‌న్నా గారితో క‌లిసి న‌టిస్తుండటం చాలా ఆనందంగా ఉంది. కాల‌భైర‌వ ఈ చిత్రానికి అద్భుత‌మైన ట్యూన్స్, నేప‌థ్య సంగీతాన్ని ఇస్తార‌ని ఆశిస్తున్నాను. ఈ మూవీ తప్పకుండా ప్రేక్షకాద‌ర‌ణ పొందుతుంద‌నే నమ్మకం ఉంది’’ అని అన్నారు.

ద‌ర్శక‌నిర్మాత నాగశేఖ‌ర్ మాట్లాడుతూ.. ‘‘గుర్తుందా శీతాకాలం టైటిల్‌కు తెలుగు ప్రేక్షకుల నుంచి అనూహ్యమైన స్పంద‌న ల‌భించండం చాలా ఆనందంగా ఉంది. ఈ సినిమాలో స‌త్యదేవ్, త‌మ‌న్నా జంట‌గా న‌టిస్తున్నారు అని ప్రకటించిన వెంట‌నే తెలుగు సినిమా మార్కెట్‌లో వ‌చ్చిన క్రేజ్ మా చిత్ర యూనిట్ ఆంద‌రిలో ఆనందంతో పాటు బాధ్యత‌ను నింపింది. ఇప్పుడు మా ప్రాజెక్ట్‌పై తెలుగు ప్రేక్షకుల్లో భారీగా అంచ‌నాలు నెల‌కొన్నాయి. ఈరోజు పూజా కార్యక్రమాల‌తో మా చిత్ర షూటింగ్‌ని అధికారికంగా ప్రారంభించాం. అతి త్వర‌లో రెగ్యుల‌ర్ షూటింగ్ ప్రారంభించి, సినిమాను సాధ్యమైనంత త్వర‌గా ప్రేక్షకుల ముందుకు తీసుకురావ‌డానికి ప్రయ‌త్నిస్తాం’’ అని అన్నారు‌.